曼城挽面子爭盃冇保流

猪拉多纳

英格蘭足總盃淪為英超豪門眼中嘅雞肋，但曼城唔係咁諗，事關呢支富豪球隊上屆決賽輸畀韋根，慘成球壇笑柄，球隊上下都耿耿於懷，今屆誓要捧盃一雪前恥。第3圈作客對英冠中游分子布力般流浪，就算曼城畀部分主力休息，仍然夠贏，客勝冇問題，甚至可以直取讓球客勝，博取較高回報。

曼城上季喺文仙尼執教下，聯賽及足總盃都屈居亞軍，特別係足總盃決賽，對住後嚟降班嘅韋根，喺一致睇好下竟然輸波，總之畀人笑到面黃。足總盃對曼城而言，無疑係內心一條刺，誓拔之而後快。球員就算經過英超快車折騰，鬥心仍然強。領隊比歷連尼亦想捧足總盃，證明自己比文仙尼優秀，絕對唔會手軟。事實上，曼城兵源充裕，英超快車期間使用輪換，仍然三戰全勝，今仗對住「英冠仔」絕對綽綽有餘。
快車檔期 人腳現分野

布力般流浪喺英冠表現麻麻，球隊太依賴前鋒佐敦洛迪斯數胡，佢一旦失準全隊即冇料到。佐敦洛迪斯喺英冠或者仲可以也文也武，但遇上曼城嘅防線，恐怕難搵到食。布力般本身亦無心盃賽，最明顯例子係英聯盃第一圈，就畀甲組仔卡素爾淘汰。唔好忘記英冠都係剛踢完快車，布力般人腳有限，疲兵鬥曼城，更加冇運行。

now 621、633及660直播