黑貓紅魔齊獻細

猪拉多纳

首回合啫！未使咁快搏槌住！

英格蘭聯賽盃4強戰首回合開打，英超包尾大幡新特蘭主場迎戰剛啱主場2連敗兼喺足總盃出局嘅哀兵曼聯，今場係兩隊3日內踢嘅第2場盃賽，唔攰就假！經過一輪頻密征戰後，「紅魔鬼」已經搏到五癆七傷，雖然教頭莫耶斯非常恨捧盃為自已差劣嘅戰績減壓，但首回合唔會敢去得太盡，至於新特蘭亦心繫護級會有保留，今仗士哥唔慌多，捧細。

（TVB 301周三凌晨3時45分直播）
哀兵上陣谷唔起

經過聖誕及新年快車期後，兩軍剛過去周日踢完足總盃賽事，話咁快又要喺聯賽盃搏命，點都有疲態。「紅魔鬼」近期面對嚴重傷兵問題，一對射手朗尼同尹佩斯傷晒，快翼艾舒利楊格及拿尼亦唔踢得，用二線兵戰鬥力下降，周日足總盃出局對士氣同心更造成沉重打擊。

家陣曼聯正陷英超年代最低潮，領隊莫耶斯都知處境不妙，賽前明言球隊好需要贏呢隻盃仔嚟振奮軍心。不過，今戰只係首回合，相信以佢保守性格，加上曼聯目前士氣同狀態，想谷亦未必谷得起，因此目標應係求一個唔輸或小勝賽果，留待次回合返主場再部署過。
留力護級唔去盡

新特蘭自從改由普耶領軍後演出續有改善，上一圈爆冷加時砌低車路士更係代表作，「黑貓」首循環聯賽主場對曼聯只被對手新星贊奴沙突然爆發轟入兩粒僅輸1比2，但當時佢哋打得唔曳，最大問題始終係唔夠攻力，對上6戰只入4粒，其中5場開細，更何況依家深陷護級漩渦，對於爭盃未必咁上心，今場心態上相信會係贏到固然好，唔贏亦冇損失．最緊要係留到力同冇人傷。呢場波橫睇掂睇都唔似會有大手交易，捧細係最佳選擇。