樂有贏谷中郁手

猪拉多纳

　　莫雷拉十幾期連勝紀錄終在上期斷纜，阿棟反覺得係好事，我唔係落井下石，因為呢股「雷神」熱潮已經炒得愈來愈熱烈，漸漸覺得有離譜，有佢馬明明應該係冷門，最終賣到4、5倍。呢個時候歇一歇，大家可以降降溫啦。

　　第一場五班1200米。「元豐泰」前仗此程放入第二，上場縮程至1000米，早段搶唔出，末段又唔識追，而成績反覆理由明顯係因為路程。今次痛定思痛，重返此程，咁同場又冇乜放頭馬，形勢好似前仗一樣，有機會憑快放殺入三甲一席。

　　第三場四班1200米。「樂有贏」今季跑親路程都係1200米，不過，試過晒3種唔同場地，先在谷草後上入Q，之後唔明阿文點解會安排佢跑田泥及田草，成績如何，大家心照不宣。

　　阿文呢次肯畀「樂有贏」重返谷草最有根據路程，仲要搵到安國倫，而唔再用騎開黎海榮，淨係睇路程及配搭轉變，已經知道阿文呢場實搏命，可以作為重心。

　　第六場三班1650米。「皇者拍檔」轉到一哩之後，兩場都跑得好好，雖然暫時贏唔到馬，起碼比起跑1200米時更具威脅力。

　　皇者拍檔對手變弱

　　比較番「皇者拍檔」近仗與今仗對手，之前交過手計有「鴻福滿滿」、「迎風飄揚」、「電子福星」等，與今場真係差十萬八千里，跑馬跑對手，只要隻馬唔係因為之前連拼後體力唔夠，以佢實力，今場大有問鼎冠軍之力。（陳華棟 資深評馬人）