又係雷神世界 兩大阿John力撐 獨取4W

猪拉多纳

香港馬壇有兩大阿John，John Size蔡約翰同John Moore大摩，得一人支持已不愁寂寞，何況係二人齊齊力撐？此位天之驕子正是有「雷神」美譽之莫雷拉，昨夜騎者先贏蔡廐「黃金宅男」，再憑摩廐「同個世界」捧走一月盃，全晚個人獨取4W，呢個馬場仲唔係佢嘅世界？
       
同個世界

剛周日停賽復出，卻在沙田將不敗紀錄斷送的莫雷拉，昨晚谷戰強勢回歸，第四場夥拍蔡約翰馬房「黃金宅男」落重飛大熱勝出，緊接第五場本地三級賽一月盃，又策騎大摩旗下「同個世界」勇奪錦標，兩駒均克服外檔劣勢掄元，盡顯雷神功架，難怪兩大洋倉之主爭相採用。及後莫雷拉又於尾兩場贏「環保戰士」及「一見鍾情」，個人食出大四喜兼包辦四、七兩口孖寶，所向披靡。
       
同個世界勇奪一月盃，大摩與馬主蘇凱榮卻同時缺席，分別由署理副練周永豪及父母蘇啟聲伉儷代勞捧盃。
一月盃大摩冧莊

正身處澳洲出席拍賣會的大摩，繼上年憑「軍事出擊」捧走一月盃後，再以「同個世界」蟬聯錦標。馬主蘇凱榮父親蘇啟聲表示賽前已胸有成竹，他說：「『同個世界』具二級賽實力，今轉戰跑馬地出爭三級賽，對手實力不強，雖抽得不利檔位，但憑莫雷拉走位機警，因應臨場偏慢步速提早發力領放，終成功走甩，直奔終點。」
       
莫雷拉已第二次替蔡約翰贏黃金宅男。

「黃金宅男」三配莫雷拉獲兩冠一亞，馬主趙冠銘大讚人馬合拍。他說：「莫雷拉今場跑得非常用心，雖然我駒抽得較不利的11檔，仍能及早切入，沿途守在有利位置競跑，贏得比預期輕鬆，相信升上三班也有一番作為。」