曼聯絕地大反擊

猪拉多纳

莫耶斯命懸一線 焗攻史雲斯

為破紀錄，「莫耶輸」可以去到幾盡？踏入2014年，莫耶斯帶領曼聯3戰皆北，上周足總盃第3周輪到史雲斯史上首次作客奧脫福贏波，「紅魔鬼」今周喺聯賽主場再戰「天鵝」，「命懸一線」嘅莫帥為保飯碗，必落柯打叫班兵主攻爭勝，只係紅魔依家士氣低落，後防長期不穩，隨時入埋唔夠輸，捧大最穩陣！

（now 621周日凌晨1時30分直播）
後防穿窿士氣差

「莫耶輸」於2014年繼續連環破紀錄，曼聯先後不敵熱刺、史雲斯同新特蘭，一周3輸確實罕見，難怪莫帥被反曼人士捧上神枱，祈求「紅魔鬼」管理層繼續畀佢領軍。曼聯依家戰術技窮，中場完全冇創造力，一味分邊兩翼傳中，進攻單調，招式畀人睇通晒，兩大前鋒朗尼同尹佩斯仲抖緊，香川真司始終融入唔到曼聯嘅進攻體系，依家只得小將贊奴沙較有驚喜，其餘球員個個踢到冇厘神氣。

曼聯傷兵問題仍然嚴重，兩大射手朗尼同尹佩斯都有傷，而快翼拿尼、中場費蘭尼、守將菲爾鍾斯及里奧費迪南等統統有傷，個陣都幾殘。另外，早前傳出季尾將進行大清洗，後防將會係重災區，搞到人人自危，戰意全失。「紅魔鬼」目前已被榜首阿仙奴拋離11分，距離第4位利物浦都差成5分，為爭前4打歐聯，莫耶斯已經別無選擇，殘陣都要砌，但最怕後防空虛又輸反擊。
天鵝打反擊特醒

史雲斯繼續缺少王牌中鋒米捷，但另一射手韋菲特邦尼近兩戰入3粒，已經全面上力，不得不防。曼聯家陣主場出戰冇晒料到，經常都會出現老鼠拉龜情況，條防線仲愈谷愈前，呢種踢法最適合「天鵝」發揮，佢哋反擊速度好高，快翼魯迪治實有大把空間搵食，隨時重演上周兩破「紅魔鬼」大門嘅一幕。

不過，曼聯始終係曼聯，無論點衰始終唔會褪熱，今場主W僅得1.42倍，都係咪掂喇！「紅魔鬼」下周聯賽要作客車路士，今戰會踢得相當進取，贏唔贏到唔知，但一定搏命，「天鵝」亦唔會坐以待斃，你一拳，我一腳，勝負難料，一於玩大啦！

莫耶斯(曼聯領隊)：大家都知我哋正處於困境，但我已經下定決心要撥亂反正，亦深信球隊可以重上正軌，我感受到更衣室所有人都充滿決心。

米高盧特立(史雲斯領隊)：好高興成為首個喺奧脫福贏曼聯嘅史雲斯領隊，而我真係唔介意成為落井下石嘅一分子，當然，我都好同情行家嘅處境！