爛仔波水晶宮細頂熱刺

猪拉多纳

英超今晚有場倫敦打吡戰，熱刺主場對水晶宮，有料教頭佩尼斯將水晶宮打造成防守王，等閒之輩唔易撕破佢地條防線。熱刺眾星經常各自為戰，進攻配合唔多，今戰將面對極大阻力，預期入波唔多，捧細盤！
佩尼斯領軍有料到

佩尼斯最叻教英超中下游球隊，佢十一月尾接掌水晶宮，唔使買一兵一卒就執好條豆腐防線，球隊近四戰只失兩粒，作客主場王曼城搏到後段僅輸0比1，論防守叻過熱刺多多聲啦！水晶宮射手查馬克全面回勇，喺前線好有威脅，球隊攻守平衡好，家陣已非降班膽。

熱刺改由舒活領軍後踢番四四二，班波整體表現係有進步。不過，球隊上場足總盃對阿仙奴再次暴露進攻問題，射手蘇爾達杜腳風長期唔順，而兩閘丹尼路斯同基爾獲加成日自己去波，鮮有同隊友做配合，進攻仍然有待改善。

佩尼斯上季帶領史篤城作客同熱刺互交白卷，今次率領水晶宮照辦煮碗繼續大踢爛仔足球，有力頂住對手，入球細有2.02倍博得過！
now 621直播