諾在其中:開心檔佳馬膽材

不死鸟

豬流感爆發，源頭喺偏遠嘅墨西哥，鄰近嘅美國居民當然人心惶惶，但係我哋都唔好諗住距離香港咁遠，就可以疏忽呀﹗呢啲感冒菌咁惡，相信冇一個地方可以獨善其身。        所謂時也命也，金融海嘯席捲全球，經濟啱啱稍為好轉，本港恆指亦上番萬五點樓上，大家都話係小陽春，但開心只係短暫，之前多位評股人大大聲講八千點先見底，後期唔跌反升，佢哋一早已經收晒聲，唔通有評股人預知突然有豬流感爆發﹖         身為美國人就仲頭痕，依家一波未平一波又起，咁搞法經濟幾時至可以復甦﹖香港馬會今季已經多次話投注額下降，左計右度，又話要趕快增加五個賽馬日，再加多廿場海外賽事先夠數，而原本喺五?一勞動節，一向係吸引內地居民來港消費嘅好時機，為咗吸引旅客而免佢哋入場費，但係畀豬流感搞一搞，馬會呢個如意算盤仲打唔打得響呢﹖ 與馬偉昌合拍        依家入馬場同出街都怕人多，容易惹到流感，但喺屋企睇賽事一樣得，所以咪理咁多，一於馬照跑。今次心水馬係尾場一班千四米嘅「開心」，呢匹馬今季由告東尼馬房轉投文家良馬房，已經跑咗五場田草千四米，前仗喺馬偉昌胯下跑第二，僅輸「帝聖龍駒」馬頸位，未能爆出半冷贏馬，上仗敗於排外檔不利，今場抽番四檔，回配馬偉昌，轉馬房未交代鬥志唔使懷疑，一於作膽。