富咸諾域治冇攻「細」

猪拉多纳

今晚嘅英格蘭足總盃第3圈重賽，富咸會喺主場迎戰諾域治，兩隊依家都排喺英超下游位置，護級形勢都好唔樂觀，踢盃賽反而成為佢哋嘅負擔。與其喺盃賽搏盡，不如專心聯賽仲好，加上兩隊今季攻擊力都差，今場可以一試2.02倍嘅「入球細」。（廣東體育周三凌晨3:45直播）
聯賽唔掂盃賽無謂搏

現時聯賽排第16嘅富咸今季主場入波唔多，所有賽事加埋只得16球，球會已經由美職西雅圖海灣者借用2007至12年効力過富咸嘅丹普西，加強入球能力。不過，呢位30歲美國國腳近呢兩場以正選上陣都冇乜表現，似乎幫唔到球隊解決燃眉之急，難怪呢間倫敦球會明知可能性好低，都想羅致韋斯咸新星拉夫摩利臣返嚟救亡。

「金絲雀」都唔好得去邊，聯賽榜排名比富咸高一位嘅佢哋，今季作客弱成為球隊致命傷，連盃賽在內，8月至今作客入得9球咁大把；主力射手加利賀柏今季5個入球，只得1個係作客入球，照咁睇嚟，今場想睇入球騷真係難啲。