連食3期白果 柏寶係時候發市

猪拉多纳

　　柏寶自從元旦日四喜臨門威威之後，連續3期冇馬贏，一係唔發市，發市當3年！

　　呢期柏寶係咪繼續龜縮大法？睇佢手馬又唔多似，全晚7匹坐騎之中，有3件啱啱贏完馬，有1隻剛剛入Q，如果揸住咁嘅兵力，埋單都係食白果，必然令人大跌眼鏡。

　　3匹新勝馬分布在第一、四及五場，「瀟洒勁龍」由田草1800米轉戰谷草1800米、「百年歡」贏完田草1600米改跑谷中1800米、「舞林高手」由田草直路賽轉跑谷中1000米，即係話冇1隻係跑番勝途，轉變係好係壞？有時真係好難講，跑到一戙都冇都唔意外。

　　瀟洒勁龍轉場掂

　　不過話分兩頭，「瀟洒勁龍」未贏之前，先係喺今次1800米入Q，當時仲要係初跑，轉場唔使太擔心。

　　「百年歡」前仗首次跑谷草，即喺一哩後上攞到第四名，細場唔係冇根據。

　　數到「舞林高手」，應該係最有危機1匹，谷草跑得少，排咗外檔多一重擔心，早段夠快猶自可，一個唔好彩，霸唔到頭位的話，無可避免要走外檔，咁就幾難會跑得好。Jack