城中話題搏到盡

猪拉多纳

　　唔信邪，都要信命，好似啱啱周末賽期，話口未完爆個不亦樂乎，吼熱門賭仔一殼眼淚。呢次谷戰又會點？阿棟唔係想烏鴉口，睇各場形勢有啲熱門唔係幾值得買，小小哋玩吓算嘞。

　　第二場四班1650米。「晨采」3季贏唔到1W，呢類處女馬捧獨贏真係非常唔划算，仲要隔晚賣到得3倍半，更加唔覺得有捧場價值，但平心而論，今場啲對手真係幾水，講班底佢最惡，潘頓又未放手，連拼未出頭都唔嫌棄，鬥志可取。

　　第五場三班1000米。「氣勢如虹」上次一馬當先返番嚟，全程好輕鬆，係雷神叻？定係隻馬轉到谷草勁咗？真係唔知真相，不過，呢次配搭冇變，路程又冇唔同，排檔好咗，升班而戰唔會失禮，係就係熱啲，勝在早早叫胡，睇吓放唔放得到。

　　第七場三班1200米。「城中話題」成日追人唔切，近兩仗總係做阿二，方仔肯定唔多服，情況好似之前佢個倉嗰匹「皇者拍檔」，終於咪畀佢執番場，相信呢匹馬亦會抱同一心態，希望在最有把握路程不停搏，必會有1場輪到佢威，雖然再遇「快人一步」，但排檔及磅位唔同，唔係冇得反先。陳華棟 資深評馬人