卡坦護級唔敢爭盃「錫」唔落

猪拉多纳

今晚繼續係盃賽天下，打頭陣嘅係意大利盃16強賽事，由卡坦尼亞主場鬥意乙嘅錫耶納。卡坦尼亞今季跌晒watt，正陷入信心危機。相反對手錫耶納講明重視意盃，雙方戰意高下立見，客軍應該可以喺法定時間內保住不敗，撐1.8倍「讓球客勝」

（now632台周三晚11:00直播）
卡坦尼亞近7戰僅1勝

卡坦尼亞今季戰績大倒退，就算喺上年10月換上盧基接掌球隊，但表現仍未見起色。佢哋暫時喺聯賽包艇，護級形勢水深火熱，仲邊得閒爭盃仔吖！事實上，呢班波近7戰只係贏得1場，上仗作客阿特蘭大輸1:2後，主帥盧基仲插班手足唔夠信心，一對守將古斯比比路斯、保羅艾華利斯又未好番，今仗實在不宜睇好。

錫耶納狀態唔算差，近8戰只曾1敗，加上後衞比蒙迪今仗復出，配合鋒將柏奧奴斯、羅仙拿、中場加坦迪阿高斯天奴等具備意甲經驗嘅球員，兩軍戰鬥力唔係差太遠，難怪主帥比列達賽前話有信心殺入8強啦！考慮到錫耶納作客出擊唔似會冒險，隨時同上圈作客博洛尼亞一樣，鬥到加時先分勝負，「讓客」當然博得過啦！