曼城神箭殺「迪」復仇

猪拉多纳

英超球隊「最快百球紀錄」勢將誕生！曼城今晚喺主場恭候卡迪夫城，今季已經喺各項賽事狂入99球嘅「藍月亮」，只要整多粒就可以破紀錄，適逢「神箭」阿古路時隔1個月終於回歸英超戰場，佢哋今季場均最少省對手3粒，加上首循環對賽曼城倒灶輸波，今晚肯定喪攻復仇，「火龍」仲邊有得剩吖？曼城「-2」，照捧1.95倍「讓主」！

（now622台周六晚11:00直播）

隨住曼城周中喺足總盃重賽大炒布力般5蛋躋身第4圈（32強），領隊比歷連尼再次強調佢嘅喪攻理念：「捧盃重要，但最重要係踢出自己嘅風格盡量入波，呢種先係我同曼城嘅哲學！」有佢呢句，各位上盤客真係放心晒啦！
藍月亮場均最少省3粒

曼城今季喺全部33場賽事攻入99球，場均「最低消費」都省3粒，今仗只要入多1球，就會比12至13球季嘅車路士用少8場時間，創造英超球隊「最快百球紀錄」。最重要係阿古路已經喺周中足總盃用「士哥」宣布強勢回歸，今晚佢擔正夥拍尼格度攻堅，呢對「Beauty and the Beast（美男與野獸）」組合，今季合力喺各項賽事攻入41球，加埋周中休戰嘅大衞施華同耶耶托尼亦可以復出，中前場真係勁到嚇死人。
卡迪夫城把握力勁弱

對家卡迪夫城自蘇斯克查接手後依然冇乜起色，上場聯賽主場鬥紐卡素明明控球在腳比率達6成，但最終照吞「喜鵲」兩蛋失晒3分，證明「火龍」把握力弱雞之餘，防線亦唔見得穩陣，造訪英超主場10戰全勝兼勁入38球嘅「藍月亮」，肯定係死路一條！

賽前卡迪夫城前鋒費沙甘保，大口氣到話有能力炮製爆冷戰果喎，但咪忘記曼城首循環試過作客倒灶以2:3輸畀「火龍」搞到冇晒面，今鋪肯定唔敢再大意，實行喪炒對手報仇咁報啦！
英超「破百紀錄榜」

球隊•球季破百所需賽事

車路士•12/13 42場

車路士•09/10 43場

曼聯•98/99 44場

曼聯•11/12 44場

曼聯•01/02 45場
藍月亮「-2」少甩拖：Data King

‧曼城今季英超主場10戰全勝喪入38球。

‧卡迪夫城近7場聯賽作客錄2和5負。

‧近兩次曼城主場讓到「-2」都開出「讓主」。