兵工廠劫「富」派「W」

猪拉多纳

攻得又守得2014持續強勢

新一年，阿仙奴繼續氣勢強橫！1月份嘅3場比賽，包括聯賽同足總盃都贏波而回，繼續坐穩榜首位置。雖然英格蘭國腳禾確特受傷要抖成6個月咁耐，不過另一翼鋒阿歷士張伯倫就啱啱傷愈復出，可以承接番師兄缺陣嘅空缺。今晚阿仙奴喺酋長球場迎戰中下游球隊富咸，贏波絕對無難度，熱捧1.52倍「讓球主勝」！

兵工廠上仗作客2:1擊敗阿士東維拉，重奪失落兩日嘅榜首位，佢哋近期表現非常對辦，近5仗全勝，當中有3場仲係保持不失，哥斯尼同梅迪薩卡呢對中堅組合更被譽為英超最佳！加上阿仙奴呢5仗合共有10個士哥，可以話攻得又守得！
爆鼻路斯基戴面罩上陣

唔少球迷擔心傷兵會成為阿仙奴爭標最大絆腳石，禾確特受傷無疑削弱咗球隊鋒力，但阿歷士張伯倫復出就可以補番；艾朗藍斯受傷後，韋舒亞亦挺身而出，上仗入波兼助攻，睇到佢嘅狀態完全返晒嚟。路斯基上場踢到爆鼻做咗手術，不過消息話佢可能會戴住面罩上陣，中場創造力冇下降，確保阿仙奴維持強勁戰鬥力。
富咸後防穿窿輸得甘

另邊廂，客隊富咸近期表現認真麻麻，近3場聯賽只取得1勝2負成績，仲要被榜尾嘅「黑貓」新特蘭大炒4:1，又吞侯城6蛋，後防線出現好多漏洞。主力貝碧托夫又好似話會離隊，唔多唔少影響到軍心。況且富咸作客表現一向麻麻，近10場作客比賽贏得2場，今晚造訪酋長球場班球員一定腳仔軟啦，一於捧「讓球主W」！