寸王迎英超100W

猪拉多纳

朗尼尹佩斯No show 紅魔等劏

莫連奴誓喺曼聯身上奪取個人英超100W！英超大戰車路士主場迎戰曼聯，車仔「寸王」教頭莫連奴喺英超累積99W，賽前講明絕不同情「紅魔鬼」主帥莫耶斯，仲話對住呢支衞冕球隊會打真軍。曼聯缺少兩大天王朗尼同尹佩斯頓成冇牙老虎，無力反抗，捧車仔主勝！

（now 621周一凌晨零時直播）

現時莫連奴已喺英超取得99場勝仗，只差一場就可到達領隊生涯另一里程碑，莫帥話100W必定會來臨，但最好係今場搞掂喎！莫連奴本身都唔多鍾意莫耶斯，一返車仔就喪撬「紅魔」主將朗尼，有心搞到莫耶斯雞毛鴨血。今場大戰前夕，「寸王」仲潤莫耶斯有份穩定嘅筍工，得到球會信任，有時間慢慢搞，絕對唔使人同情，潛台詞即係唔會留手啦。
尼曼查馬迪返車即踢正選

曼聯續有王牌進攻組合朗尼同尹佩斯缺陣，全世界都話佢哋依家只係冇牙老虎，但莫連奴偏偏唱反調，強調曼聯始終係曼聯，仲話今場係對住衞冕球隊，危機四伏，真係超畀面囉！相比起車路士，「紅魔鬼」進攻系統運作欠順，日本球星香川真司上場移入中路，中場組織係好咗，兩大進攻主力韋碧克同贊奴沙亦交到貨，但點都未夠卡士贏車仔囉。

車路士剛以高價回購舊將塞爾維亞中場尼曼查馬迪，佢會同「紅魔」鄉里尼曼查維迪成為敵人，莫連奴話唔會搵佢打正選。車路士中場林柏特已經復操，中前場鬼死咁多人用，連曼聯迷恨到流晒口水嘅桑馬達都要長坐冷板，依家主要傷兵係守將伊雲洛域，影響唔大啦。反觀曼聯後面仲有里奧費迪南及菲爾鍾斯等傷兵，連莊尼伊雲斯都唔知踢唔踢得，後防穿窿難望搶分。
莫連奴（車路士領隊）

我哋面對唔係落後榜首11分嘅球隊，而係冠軍，我數唔到有幾多次曼聯能夠喺逆境中變得更強。我深信曼聯唔會炒莫耶斯，佢做得好好，曼聯需要一名長期穩定執教嘅主帥。
莫耶斯（曼聯領隊）

我哋一直好盡力去簽新球員，不過一月唔算係一個收購球員嘅好時機，我唔鍾意畀咗希望球迷，到最後一個球員都簽唔到，我只可以話我哋冇坐喺度，可以嘅話希望買一、兩名新兵。