鋒線大勇讓得起惡客熱刺劏天鵝

猪拉多纳

史雲斯前鋒韋菲特邦尼近期腳風勁順，先喺月初對曼城攻入兩球，之後足總盃又射殺曼聯，今季加埋已經入咗10個士哥添！不過今晚「天鵝」主場迎戰熱刺，齋靠呢位科特迪瓦箭頭好難有作為，事關熱刺今季做咗作客專家，基斯甸艾歷臣同艾迪巴約又大勇，聯賽作客已經連贏4場，就算今場要讓平半都唔使怕，一於冷敲2.04倍上盤！
近10場作客贏7場

一般球隊通常都係主強客弱，唯獨熱刺偏偏例外，佢哋今季作客成績比主場成績仲要強，近10場作客攞到7勝1和2負，所以就算今晚佢哋造訪自由球場都唔會腳仔軟！而且自從新領隊舒活上任之後，熱刺表現明顯有好轉，尤其聯賽方面，近3場聯賽全勝。雖然佢哋喺足總盃輸咗畀阿仙奴，但話晒人哋都係榜首球隊，輸波都情有可原，同埋熱刺並唔係完全無機會，只不過多次射門一係被門將救出，一係就同龍門擦身而過，只可以話佢哋輸運氣！何況主力射手迪科爾上場聯賽對水晶宮時射入効力熱刺以嚟第143球，但呢位31歲前鋒下月尾就會轉投美職加盟FC多倫多，相信佢喺剩番落嚟嘅比賽都會加多幾錢肉緊，入多幾球靚波，留個美好回憶畀班粉絲。
史雲斯單靠韋菲特邦尼

另邊廂，主隊「天鵝」史雲斯近況認真麻麻，近8場比賽只係得1場勝仗。至弊係佢哋無主場威力可言，近8場主場比賽只得1勝4和3負。除咗進攻主力米捷仲養緊傷之外，柏保路靴南迪斯同埋藍馬都因傷缺陣，火力大大減弱，前線只係靠韋菲特邦尼撐住，雖然呢位科特迪瓦射手近期好弗，仲話今季目標係為史雲斯射入20球，但班波整體人腳同近況都喺客隊熱刺之下，就算今場有門將禾姆傷愈復出，都好難頂得住熱刺嘅攻勢，今晚受讓平半都掂唔過。