筍盤益你:鷹闖轉場有力突襲

不死鸟

大摩篤定贏得今屆練馬師冠軍，但錢同榮譽冇人嫌多，今日話晒係大賽日，相信又係呢個倉嘅出擊好時機，而頭五場摩廐均冇馬列陣，想食尾胡不妨吼實「鷹闖」。

        第十一場一班千四米，呢場評分上限為105分，但一眾高分馬嘅實力唔算頂級，另「川滙主帥」今季夠準，但跳爭一班賽卡士輸蝕，形成「鷹闖」有機會偷雞。愛爾蘭馬出名遲熟，而「鷹闖」踏入四歲後表現亦對辦，除上仗谷戰突然走樣外，今季基本上每戰必近﹔「鷹闖」只跑過一次千四米，輸畀頭馬「大腦」六個半馬位跑第八，走勢普通但今仗對手完全唔喺嗰皮，加上排二檔早段應好易喺內叠取得遮擋，以此駒追勁有權後上橫掃，有分頭千祈咪錯過。

       德甲漢諾威今季「主場一條龍，作客即變蟲」，上個禮拜?主場贏科隆二比一後，今晚作客波琴係時候捧對家。波琴目前以二十八分排第十四，漢諾威多四分排第十三，主隊只領先尾三比勒費爾德三分，為免捲入降班漩渦，呢場一定搏甩髀，鬥志必較冇咩好爭嘅漢諾威高昂。　　　

        再結合近況，波琴上仗作客輸畀雲達不來梅二比三，但近三仗加埋入五粒，證明攻力有一定保證。相反，漢諾威係今季德甲唯一作客未開齋球隊，兼且最重要係成季未試過打呲贏兩場，數據咁強又點可以唔買波琴﹖一於捧主客和主勝。