主帥有料費倫-1咪走寶

猪拉多纳

意大利盃8強今晚費倫天拿主場對乙組仔錫耶納，費倫教練蒙迪拿調度得宜，有兩套陣容出戰聯賽及盃賽，效果理想。呢位少帥簽人眼光獨到，新加盟嘅前鋒馬特尼上仗即梅開二度，提升球隊火力，相信要淨贏錫耶納兩球冇問題，直取有1.76倍嘅讓球主勝。

（now 633及660周五凌晨4時直播）
馬特尼搏命報恩

費倫今季長期聯賽排前4，亦打入歐霸盃32強及意盃8強，三線作戰都難唔倒「紫百合」，全賴少帥蒙迪拿採輪換制，有效分配人腳。雖然話盃賽多數派副選，但都會加插祖亞昆等經驗豐富嘅球員孭飛，以老帶新。

蒙迪拿戰術高明之餘，仲有化腐朽為神奇嘅「魔法」，早前向AC米蘭借用馬特尼遭到唔少非議，事關呢位射手半季只入得一球，被嘲為「AC史上最差9號仔」。不過佢加盟費倫首仗即省兩粒更有助攻，表現如魚得水。馬特尼屈咗咁耐難得獲垂青，依家正係表現自己好時機。

錫耶納上圈能淘汰意甲卡坦尼亞，只因對手無心兼顧盃賽。錫軍喺意乙排中下游，同費倫相差幾班波，就算睇番錫耶納喺甲組嘅時代，對上6次作客費倫天拿，5次輸波而回，今仗淨輸兩球或以上好正路。