阿仙奴磨刀大起高地

猪拉多纳

今晚英格蘭足總盃第4圈（32強）最矚目戲碼，英超一哥阿仙奴坐鎮主場迎接英甲仔高雲地利嘅越級挑戰。由於阿仙奴仍有大堆傷兵，唔排除領隊雲格會多派副選落場，高地自知勝算甚低，難得有機會嚟到酋長球場同一班球星切磋，判輸嚟踢隨時合演入球騷，就算中位數調至3.5球照捧大盤。（now 621及635周六凌晨3時45分直播）
兵工廠周五晚比賽醒神

阿仙奴今仗張傷兵名單水蛇春咁長，雲格有心爭英足盃，不過今仗對手只係對英甲嘅高雲地利，「教授」畀班主力如基奧特、奧斯爾等休息吓一啲都唔奇。不過，阿仙奴嘅後備亦唔嘢小，好似今季養傷咗一輪嘅普多斯基及阿歷士張伯倫，實力毋庸置疑，只因好番冇耐，雲格錫住佢哋先至放在冷板候命，今仗遇弱兩人好大機會正選，磨番利把兩把尖刀。今季因財困被扣10分起步嘅高雲地利，憑住眾志成城嘅決心，已經爬上中游，但過於進取嘅踢法，令佢哋變成入得又失得，聯賽得失球係55比45，難得同勁旅阿仙奴交手預咗輸波，冇心理包袱下豁出去進攻。

睇番前年英聯盃高地亦曾造訪酋長球場，結果遭半力出擊嘅兵工廠大炒六個一皮，相信今晚會歷史重演，入球大咪錯過。

雖然兵工廠甚少喺英國時間周五晚（香港時間周六凌晨）出擊，不過佢哋喺呢日比賽特別醒神，睇番近10次取得6勝3和1負，近年不乏5比0炒列斯聯、4比2力克利物浦、3比2擊敗紐卡素等激鬥，勁旺大波膽，今仗只係出戰英甲嘅高雲地利，隨時又上演大屠殺。