慕遜主場惡到暈 「讓主」唔赦拜仁

猪拉多纳

地頭出戰9場入25球冠德甲

抖咗個幾月，德甲今晚終於戰火重燃！打頭陣即刻有上半季表現最令人驚喜嘅慕遜加柏，歇冬後第一擊喺主場硬撼班霸拜仁。雖然面對嘅係超級難關，不過慕遜依家可以排得前過多蒙特企喺第3位，絕對唔係冇料到。況且佢哋今季主場8勝1和未輸過，絕對有力喺拜仁身上搶分，一於撐3倍「讓主」！

（有線61及201周六凌晨3:30直播）

德甲近年打起咗唔少「神奇球隊」，但好多都係上半季威完，下半季就「打回原形」。不過小弟認為慕遜加柏唔會係呢種曇花一現，事關佢哋嘅人腳配置相當有說服力，唔使踢歐洲賽之下兵源亦算充足，門將達史特根同翼鋒靴爾文已經被公認為歐洲頂級新星，連荷蘭國腳前鋒盧克迪莊都要做後備兼尋求轉會，就知佢哋實力有番咁上下！
拜仁傷兵成籮未必鍊到盡

講開前鋒，拉菲爾基達奴同麥斯古斯嘅組合真係如魚得水，佢兩個上半季分別入咗9球同8球，加上靈魂人物艾蘭高鋪橋搭路，9場主場戰喪入25球冠絕德甲，自己地頭嘅威力仲勁過拜仁添！

拜仁歇冬期間拉隊去亞洲集訓，但唔知係咪操得太勁，尋日練波就有洛賓、舒韋恩史迪加、拿姆、查維馬天尼斯同雲拜頓等五個球員因傷缺練，即使佢哋未必一定缺陣，但拜仁依家喺聯賽有7分領先優勢兼踢少一場，歐聯同德國盃又有後顧之憂，照計哥迪奧拿唔會咁心急搏殘班球員，呢場作客硬仗攞1分都唔係壞事吖！
慕遜歇冬前狀態弗爆

‧慕遜加柏今季聯賽主場不敗，9戰錄得8勝1和佳績。

‧慕遜加柏歇冬前8場聯賽6勝2和未輸過。

‧拜仁近6次德甲作客慕遜加柏，僅得1勝4和1負。

Data King