廠仔開「大」騷賀雲格抵撐

猪拉多纳

高雲火力唔曳隨時破到蛋

阿仙奴今季演出回勇，盛傳領隊雲格好快會同「兵工廠」續約3年，咁啱佢哋今晚喺英格蘭足總盃第4圈（32強）主場迎戰甲組仔高雲地利，一眾「廠仔」肯定想入多幾粒祝賀主帥。考慮到高雲地利鋒力都唔算太差，盃賽易爆冷隨時偷雞破到蛋，入球大細中位數開到3.5球，1.75倍入球大都抵玩。

（now621及635台周六凌晨3:45直播）
傳雲格續約3年 普多斯基踢爭氣波

雖然兵工廠有鋪收起主力踢盃賽嘅癮，不過預計上場坐後備嘅前鋒普多斯基、中場阿歷士張伯倫、路斯基等人都會披甲，火力依然有保證。最近傳出阿仙奴為咗收購史浩克04超新星達斯拿，有意用普多斯基加錢完成交易，後者堂堂德國國腳好似街市買餸搭棵葱畀人送走咁失威，今仗係時候發威數胡證明自己實力。

無可否認高雲地利牌面差一截，然而佢哋兩大鋒將法蘭克穆沙、李安奇勒今季演出穩定，前者連續4場攞到「士哥」，後者今季夾夾埋埋已經入咗18球，賽前更傳出佢向球會攤牌要求離隊，相信今仗都會同普多斯基一樣，鍊到盡求「騷哥利」抬高身價博番份靚合約，一個唔覺意射破「兵工廠」大門肯定身價急升。考慮到阿仙奴後備門神法比安斯基不時發瘟「送禮」，高雲地利唔係冇機會破蛋，入球大值得捧場。
英格蘭足總盃賽制

現為第4圈階段，法定時間內打和將擇日重賽。