祖記專一為3星而戰

猪拉多纳

祖雲達斯成為「好男人兵團」，事關佢哋夠晒「專一」，心中只有意甲，周中意大利盃8強對勁敵羅馬，居然以副選出擊，結果被淘汰出局。充分反映祖記只願為聯賽而戰，球隊已累積意甲12連勝，踢得咁順，冇理由畀佢停，今晚作客拉素，照攻可也。拉素今季兩鬥祖記，全敗共失8球，未踢已先輸信心，恐怕難逃再敗，祖雲達斯讓半一，力捧上盤。

祖雲達斯一向視聯賽錦標為首要目標，今季更要為「3星」而戰。根據意甲傳統，每贏10次聯賽冠軍，就會喺球衣上繡1粒星，祖記因「電話門」假波案，被褫奪兩季聯賽冠軍，因此官方數字，祖雲達斯僅捧29次盃。雖然會方一直堅持球隊31次奪冠，但為令各方心服口服，決心贏埋今季冠軍，名正言順繡上3粒星，所以對聯賽特別重視。上周中意大利盃對羅馬，正選陣容收起隊長門神保方、中場保羅普巴、一對前鋒泰維斯、洛蘭迪、左右側擊重心卡華禾艾沙姆、列治史迪拿，根本想放棄盃賽，全力爭聯賽錦標。
今季兩遇拉素都大勝

因此，預料祖記教練干地今仗會精銳盡出，爭取聯賽13連勝，睇番佢哋過去12場聯賽勝仗，有10場淨贏兩球或以上。雙方今季喺意超盃及首循環聯賽交手，祖記分別大勝4比0及4比1，完全唔同級數。拉素早前聘請利查回巢執教，成績有改善，好大程度上因為對手弱，今次遇上剋星祖記，相信冇運行。
TVB 301直播