噴射機臨急換帥益水手

猪拉多纳

澳職今季特別多人事變動，近況唔掂嘅紐卡素噴射機日前炒教練雲艾蒙，走馬上任嘅新帥辛尼今日首次領軍，就要帶兵作客前列分子中岸水手，睇怕都係凶多吉少喇！

（有線64及203周六下午4:45直播）
水手防守力超強

紐卡素噴射機最近4場聯賽1和3負未贏過，結果會方終於頂唔順，喺星期一宣布向教練雲艾蒙開刀，咁又點？成隊波都係立立亂，新教練辛尼仲未知新簽嘅前鋒格菲斯出唔出得添，因為青島中能發嘅轉會紙仲未搞妥！至於阿當泰加特、比爾蘭特、安祖賀利同干洛卓文，已經踢完U22亞洲盃可以歸隊，不過佢哋啱啱先踢完國際賽兼舟車勞頓，好難旨意呢幾位小將會有好表現。

中岸水手雖然受馬高斯科利斯提早收咧，同埋麥堅治離隊消息困擾，不過呢班波勝在有強大嘅防守力，對上4場聯賽雖然入得4球，但已足夠攞到2勝2和不敗成績。據報「水手」正力斟富山勝利個中場山瀨幸宏過檔加強創造力，可見球隊野心勃勃，以麥比連同麥西蒙等射手嘅質素，只要入1粒就已經夠拎晒3分啦！
頂占筍盤：中岸水手（勝）