幸運歡笑戴面箍搏

猪拉多纳

　　今次係蛇年最後一戰，再下一次要等一年之後嘞！馬年大年初三，哈哈。阿棟認為今次有啲場合可以買得重手啲，不過，千祈唔好諗住年近歲晚錢博錢，呢個世界有時天意弄人，記得量力而為。就此預祝讀者們順利攞個尾彩。

　　第七場一級賽1000米。「熊英雄」上次順利勝出，贏得幾老定，都冇放「沙紙」同「活力飛駒」在眼內，呢匹曾幾何時被譽為直路賽明星，一旦跑得番昔日水準，絕對有資格在級際賽爭逐名利，難得用潘頓，配搭更強，表面蝕就蝕啲，有賠率，可以博一博。

　　第九場三班1200米。「幸運歡笑」初出跑第四，唔算有咩特別，但有一點值得留意，大告嘅馬初出跑得好真係唔多，在我記憶之中，因此，對於上場表現係有啲喜出望外。

　　另外，今次告達理在「幸運歡笑」的配備上整色整水，係有針對性，事關外地係有用面箍，大告跑完一場即作出改變，行動咁迅速，真係唔使多講啦，除咗想盡早贏，仲有咩原因呢。

　　第十場二班1200米。「友瑩格」連贏兩場，屬蘇廐馬甚為少見的例子，而呢匹馬真係勁，前仗贏完場普通三班賽，估唔到「友瑩格」上仗加磅多仍然可以再贏，連勁旅「劍飛聲」都追佢唔到，的確係愈贏愈有氣勢。

　　友瑩格配潘頓信心保證

　　呢次「友瑩格」上到二班跑，唔使再負重磅，當然會幫到隻馬發揮得更好，總之，潘頓今季同呢匹馬合作無間，屬於信心保證，唔信佢，仲信邊匹好呢？！