車仔半細唔怕追

猪拉多纳

莫帥算死草 輪換鬥史篤城

車路士主帥莫連奴早前話自己比英格蘭人更似英格蘭人，明寸其他行家弱陣戰盃賽，今次於足總盃第四圈（32強）主場對史篤城賽前話會派超強陣出擊，但佢哋嚟緊周中要於英超搏殺，莫帥點都會留有一手啦，咪畀佢啲語言偽術呃咗，車仔必作輪換，隨時hea踢小勝收工，博半場細啦！

（now 621及633周日晚11時30分直播）

莫連奴不嬲把口唔收，早前出席頒獎禮時不忘發功，話自己高度重視英格蘭盃賽，次次都強陣出擊，比英格蘭人更懂得尊重國內盃賽，擺明寸緊成日弱陣hea踢盃賽嘅行家。到底點先係強陣？個個標準都唔同，講真，車仔陣內粒粒皆星，都幾難砌個弱陣，佢今場賽前放話會派出超強陣搏殺，大家都係唔好信到十足十喇。
丹巴巴亞舒賀爾尼擔正

莫帥出名算死草，足總盃主場出戰史篤城係簡單任務，使乜精銳盡出吖。由於過幾日要打聯賽，上場鬥曼聯連中三元嘅老將伊度奧相信會休戰，射手費蘭度托利斯養緊傷，丹巴巴亞係時候擔大旗攻堅，佢家陣雪到硬晒，叻極有限！近期失寵嘅德國國腳舒賀爾尼預期有份落場，新兵尼曼查馬迪都有機會披甲，戰鬥力少少哋打個八折啦。
史篤城泊晒大巴後半場

史篤城今季曾於主場打出超水準砌低車路士，教頭曉士雖然教波唔叻，但都唔會笨到作客同車仔鬥攻，今戰都係泊晒啲大巴喺後半場塞實啲位，只於死球博大霧死湧爛湧。史篤城專心死守頂得吓，大軍近三次造訪史丹福橋球場都係僅敗，半場全部開細，今場預期戰況好相似，半場唔慌多士哥。

莫連奴(車路士)：係人都知史篤城踢法體力化，而且非常直接，死球仲威脅好大，絕對唔易對付，所以我一定會強陣出擊爭取晉級！

曉士(史篤城)：我哋之前贏過車路士，呢點令球員充滿信心，依家車仔處於強勢，呢場波實好難踢，但盃賽場合乜都可能發生嘅！