帕爾馬睇定嚟食

猪拉多纳

烏甸神經刀亂咁搏

意甲球隊烏甸尼斯以往成績穩定，屬國內聯賽二線球隊，比上不足，比下有餘；不過今季班波變咗神經刀，近期於盃賽連環砌低米蘭雙雄，好似好叻咁，但返到聯賽完全唔對辦，今次作客帕爾馬仍然唔多樂觀，肥叔睇好帕爾馬主場贏得。

（周日晚10時開賽）

烏甸近年踢來踢去都係靠王牌前鋒迪拿達利，但呢位超級射手年事已高，本季產量大減，已經不復當年勇，直接影響球隊戰績滑落，現時位列下游，面對沉重護級壓力。不過，球會幕後人仲唔識死，於盃賽場場砌到盡，經過上場激戰後，烏甸球員肯定未回到氣，今場受讓都冇着數！帕爾馬呢班波踢得好鬼精，知道自己喺乜嘢位置，專門揀波踢，相信今場又係佢哋出擊時候，值得留意。
奧沙辛拿受讓「包」掂

同日西甲賽事奧沙辛拿主場對畢爾包，論近況同級數，畢爾包都喺對手之上，所以今場盤口作客都要讓波，不過奧沙辛拿主場威力唔講得笑，強如皇馬同巴塞都於聯賽贏唔到佢哋，足見奧沙辛拿真係有料到，只要打出正常水準，絕對有力保持不敗，主場受讓真係筍到暈，呢隻下盤不容錯過！

（周一凌晨零時開賽）