計得精明:中華英雄喜逢弱旅

不死鸟

馬不停蹄，五月合共有十個賽馬天，如果冇記錯應該破晒以往紀錄。明日已是八日之內第三次跑沙田賽事，有不少場次都出現冷場，其中有多駒更是延遲報名時才加入。賽事編得太密，不要說是馬迷，連馬匹都可能吃不消。

        延遲報名加入之馬，過往予人感覺係湊熱鬧性質，但近年延遲報名馬成績其實不太差，原因係可以睇通對手，知己知彼下搏殺自然更加得心應手。

        第二場四班千四米，「中華英雄」正是延遲報名才加入之馬，雖然今季未贏過，但今番同場對手亦未見得強，難得遇上一群弱旅，徐雨石當然把握機會替此駒爭勝。一月初，「中華英雄」曾於三班同程快放入Ｑ，早前已在二班贏馬的「家家寶」要騎足大半條直路才僅在終點前數步超越牠，賽績水準相當高。「中華英雄」上仗出爭谷草千二米，前段放得急下仍入位，反映近期狀態已回勇。

        今戰「中華英雄」睇準對手弱即報名上陣，只要跑回早前力拼「家家寶」時的八、九成水準，已足以在此呼風喚雨，有望打開今季勝門。