巴塞收起「利」刃玩細啱數

猪拉多纳

盃賽緊要定聯賽緊要？呢個咁白癡嘅問題係人都識答！所以巴塞隆拿今晚响西班牙盃8強次回合主場對利雲特，咪使旨意「地上最強」會搏，玩吓個2.25倍入球細就差唔多。

（now632台周四清晨5:00直播）

巴塞呢排認真忙碌，禮拜日剛啱聯賽打完馬拉加，今晚又要主場對利雲特，但係至攞命係嚟緊呢個禮拜六（年初二），佢哋又要喺聯賽大戰來訪嘅華倫西亞。無疑華倫呢季好曳，喺西甲更加5戰不勝，不過爛船都有3斤釘，巴塞打「蝙蝠兵團」無得話啅硬，結合佢哋家陣同馬體會同分，又只係領前皇馬1分咁大把，巴塞今晚喺西盃唔留力點得？更何況佢哋首回合Lead住4:1，唔輸3球或以上都入4強，仲同你去搏？
「小白」復出鬥利雲特谷態

正因為呢個禮拜周身唔得閒，早喺星期一已經有消息傳出，巴塞會盡可能畀班主將休息，傷愈復出嘅阿費利、沙治羅拔圖、基斯甸泰路幾件據講都會係今場波擔正，唯一一個大佬肯定落場嘅，就係剛啱好番復操嘅「小白」恩尼斯達，問題係巴塞今場放佢出嚟，似係操狀態多過搏殺，又點會同利雲特死過吖！呢啲環境唔使諗，巴塞贏都成問題，又點可能大手交易，想學上季咁主場炒人7蛋？算罷啦，都係博中位數3.5球嘅入球細正路啲。
首回合：巴客贏4:1