曼城車仔新春大鬥法

猪拉多纳

關鍵6分波谷到盡

周二凌晨上演今輪英超壓軸好戲，曼城主場迎戰車路士。曼城現為歐洲五大聯賽No.1進攻王，平均每場射入近3球，進攻火力超級驚人，球隊上下信心爆棚，面對同級球隊車路士一樣照搶攻。車仔形勢被動今戰唔輸得，預期會同主隊駁火，蘇豪首選入球大。

（now 621周二凌晨4時直播）

曼城上周中聯賽作客熱刺本被視為硬仗，點知踢落曼城清風送爽以5比1技術性擊倒對手，踢出本季另一場代表作。曼城於聯賽23戰射入68球，平均每場取得近3個入球，數字更高於拜仁慕尼黑、巴塞隆拿及皇家馬德里等歐洲頂級勁旅，表現異常突出。佢哋今季主場先後大勝曼聯、阿仙奴等同級勁敵，故此面對車路士依然一面倒被視為贏波熱門。
曼城進攻瓣數多

曼城主力射手阿古路上場勇戰傷出，預計要休息一個月，不過球隊板凳深度夠，兩大中鋒迪斯高及尼格度同樣有份量，後者傷勢已無大礙，可以復出攻堅，連新兵祖維迪上場都有士哥，埋門能力並冇減弱。西班牙中場大衞施華剛戰同樣表現出色，為隊友鋪橋搭路盡顯身價，快翼捷西斯拿華斯側擊力強，前線進攻點咁多，對手實令招架。

車路士上輪主場對韋斯咸全場作出39次射門，但攻極唔入爆冷痛失兩分，射手伊度奧及進攻中場夏薩特等人腳風欠順，令不少熱門客損手。現時車路士落後榜首曼城3分，今場屬爭標關鍵6分波，若然車仔再有閃失，爭冠形勢就會更被動，主帥「寸王」莫連奴唔會坐以待斃，將會出盡全力爭勝，預期今戰多入球，捧入球大。
領隊Chit Chat

比歷連尼(曼城領隊)：之前莫連奴鬧爆韋斯咸踢緊19世紀嘅足球，但我唔會學佢咁批評人哋嘅踢法，因為每隊都要諗計解決對方畀你嘅難題。

莫連奴(車路士領隊)：曼城今季好鬼有運，經常喺球證誤判中攞到着數，好似上仗熱刺未獲12碼及丹尼路斯無辜領紅，令佢哋大勝，我覺得一切都太過巧合囉。