比帥祝大家曼事勝意

猪拉多纳

今晚英超上演「雙藍豪門大戰」，由「藍月亮」曼城主場惡鬥「藍戰士」車路士！雖然車仔係爭標分子之一，但今晚要造訪主場所向披靡嘅曼城，當然難以睇好啦！「車長」莫連奴賽前大打口水戰，狂插對手獲球證幫拖兼唔放財政公平競技法在眼內，但有錢惡晒嘅曼城主帥比歷連尼一於懶理，仲話要出盡全力砌低爭冠對手奠定王者地位，捧1.7倍主W啦！

（now621台周二凌晨4:00直播）
阿古路打柴「雙塔」一樣掂

今日係年初四，新正頭，當然要祝各位讀者「鏝事勝意」啦！「有錢佬」曼城兵力強大，砌兩隊波出嚟都仲得，難怪有網民喺個「曼」字隔離加個金字邊啦！查實曼城上輪聯賽趁阿仙奴失分「爬頭」做一哥，雖然車路士今周擊敗「藍月亮」就可以追至同分，但難度真係相當大，皆因曼城今季18仗主場賽事除咗喺歐聯輸過畀拜仁，其餘17戰贏晒，最恐怖嘅係其中有12場波至少攻入4球，即使阿古路傷完又傷，都仲有「雙塔」迪斯高同尼格度搶住發威，加埋終於有得踢嘅祖維迪上仗喺聯賽開埋齋，有乜冬瓜豆腐都可以後備落場搏殺，「藍月亮」全方位開火，車仔點頂得住呀！
比歷連尼懶理寸王出口術

再講，車路士上仗先被韋斯咸守和，全場39次射門都入唔到波，證明班前鋒實在唔多信得過。可能莫連奴都知自己班波嘅實力唔及曼城啦，所以喺賽前記招出口術暗寸「藍月亮」，插佢哋視財政公平競技法如無物，希望歐洲足協「做嘢」！

有記者就呢番言論叫比歷連尼回應，不過見慣大場面嘅比帥又點會畀「寸王」影響到吖：「我唔會在乎呢啲嘢，我只係關心要應付嘅比賽，我哋會喺球場上『講嘢』。」小妹亦深信呢位冷靜嘅「工程師」功力不下於莫連奴，今晚「鏝城」贏波做一哥，冇問題啦！
Data King 車仔訪「鏝」例衰

‧曼城近7戰全勝，其中5場開出入球大。

‧車路士最近4次作客曼城全數落敗，其中3場都失兩球。

‧曼城今季18場主場賽事，有16戰出現3個入球或以上。
乜都玩錦囊 曼城攻強守弱玩大佢

車路士防守唔係曳，但面對曼城嘅強大火力，即使莫連奴出動曾經贏過巴塞嘅招牌「鐵桶陣」，都難以抵擋對手；不過「藍月亮」防線亦唔多穩陣，最近10仗得兩場冇失波，車仔即使輸波都可能未必使吞蛋，撐曼城之餘，不妨兼顧埋1.65倍入球大啦！