烏甸盃賽醒神+1有揸拿

猪拉多纳

周三凌晨上演意大利盃4強首回合，由烏甸尼斯主場對費倫天拿。烏甸變身「盃賽殺手」，對上兩圈淘汰米蘭雙雄唔講得笑。事實上呢支「黑白兵團」踢盃賽偶有佳作。費倫銳意爭聯賽前三取歐聯入場券，盃賽多數派副選應戰，而且畢竟首回合，「紫百合」作客唔輸已經有着數，費倫天拿要讓波寧揀對家讓球主勝。

（now633及660周三凌晨4時直播）

烏甸尼斯聯賽成績麻麻，但轉戰意盃踢到曉飛，繼淘汰國米後，上圈作客贏埋AC米蘭，令唔少球迷跌眼鏡。睇嚟佢哋想一嘗冠軍滋味，暫時懶理聯賽戰線。事實上，以往出現唔少球隊聯賽降班，但打入盃賽決賽，甚至拎埋冠軍嘅例子，最經典當然係上屆英格蘭足總盃盟主韋根，最尾都要降落英冠。
費倫次回合回師先搏

烏甸想創造另一神話，最緊要係把握首回合主場之利，盡量爭取贏波，最低限度唔輸先有價講。烏甸今季聯賽首循環曾以1比0擊敗費倫天拿，並唔失禮，今場要保不敗機會樂觀。

費倫天拿今季無論踢歐霸盃或意盃，都派唔少副選出擊，但球隊近況走下坡，上圈險勝乙組仔錫耶納，而近兩場聯賽都失分。射手基奧斯比羅斯長抖之下，新兵馬特尼踢完一場好波後又變番冇料到，鋒線缺乏大將，難以咬入烏甸。而且費倫次回合有地利，今場唔一定要贏，等次回合再同你死過都未遲，讓波有暗湧。