皇馬谷埋一肚火爆畀「里」睇

猪拉多纳

上屆決賽稱臣 聯賽又落後

谷埋谷埋，皇馬呢個Moment要爆喇！今晚西盃4強爆發「馬德里打吡」，首回合先由皇馬主場恭候西甲「新一哥」馬德里體育會。「銀河艦隊」上屆決賽正正係輸畀呢支同市宿敵，家陣喺聯賽又爬唔到馬體會頭，咁多怒火唔趁今晚發洩等幾時？皇馬讓半一要上盤。

（now632台周四凌晨3:00直播）

雙方上年5月喺西盃決賽打到加時，結果皇馬輸1:2同呢項錦標擦身而過，兩支同市宿敵今晚又喺呢個戰場相逢，「銀河艦隊」肯定想報番一敗之仇。考慮到「床單兵團」今季喺卡達朗主場未輸過，皇馬預咗次回合惡踢，今晚喺巴拿貝出擊實搶先發動狂轟猛炸，鬥心唔使懷疑。
謝斯仔大勇艾斯高擔正

仲有喎，皇馬啱啱喺聯賽畀畢爾包逼和1:1，王牌C朗仲因為摑古柏治隨時要坐3場西甲波監，但隊友沙比阿朗素等都唔服呢項判決，屈埋屈埋，今仗肯定爆發！

賽前皇馬主帥安察洛堤話，加里夫巴利有望克服背部傷患候命，不過亨格比利認為就算「大聖爺」趕唔切復出都冇所謂，事關迪馬利亞同謝斯洛迪古斯都夠晒資格頂巴利個位，當中「謝斯仔」更已經連續兩仗有波入添，加埋上輪聯賽休戰嘅艾斯高擔番正，「銀河艦隊」中前場件件都夠料數胡！
馬體會3線發展吃力

馬體會砌低皇蘇、自96年之後首登西甲榜首，今季極有可能打破「皇巴」壟斷局面，風頭一時無兩。之不過馬體會板櫈深度明顯不足，要西甲、西盃、歐聯3線發展真係好鬼吃力，最弊係除咗左閘菲臘路爾斯、中場堤亞高文迪斯同翼鋒阿達杜倫養緊傷之外，韋拿亦都喺上場聯賽拉傷左腳大腿肌肉盛傳要抖10日，今晚場波肯定唔使預佢，到時迪亞高哥斯達實畀人嘜到一戙都冇，想搵食都難，首回合都係捧主場出擊嘅皇馬明智啲！
Data King 銀河艦隊西盃零失球

皇馬最近12場主場賽事全部贏晒。

「銀河艦隊」今屆6場西盃零失球。

馬體會近8戰有7仗開半場細。
西盃賽制

採主客兩回合制，今場為4強首回合，若兩回合計打和，計算作客入球優惠，未分勝負則於次回合法定時間後加時30分鐘，加時仍計算作客入球優惠，再和則互射12碼決勝。