C+3欄走得快好世界 無敵王者有胡叫

猪拉多纳

　　周末跑馬個個膽戰心驚，無他，唔知邊場會爆到亂晒籠，又唔知邊場會熱到離晒譜，其實又唔只得周末係咁，呢個係依家真實寫照，一年比一年難賭，畀人「打劫」問題愈來愈嚴重，馬迷經常成為大戶點心，情況就好似股票市場一樣，不過就冇乜人監管。

　　算啦，賭仔心癮難戒，唔贏冇命、唔賭會病，惟有求自保，咁呢期點算好？今次沙田7草3泥賽事，好似泥地幾場最易入手，個局唔係太難拆，但會唔會係請君入甕格局，真係到時跑過至知。

　　7場草地點度好？C+3欄跑馬，質素高低唔係首要因素，狀態勇唔勇亦唔使太拘泥，最緊要係跑法夠唔夠主動，正所謂走得快，好世界，今季都唔知見過幾多事例，千祈唔好唔信。

　　左揀右揀，選定了3駒介紹，第四場「無敵王者」近績靠得住，對手雖然好似幾強，勝在放頭跑，叫住胡先；第六場「感恩」今季未贏過，大摩忽然用個七磅仔呂卓賢，配搭比較出奇，但亦可能係出奇制勝，恃住減多幾磅，盡情放；第十場「火紅人」，剛剛贏得輕鬆，可能慌死連捷有阻力，搵埋雷神，唔使擔心冇決心。(Jack)