蜜圈直路賽醒

猪拉多纳

　　嗱嗱嗱，又到周六賽期，阿棟次次都會勸導馬友們唔好唔信邪，真係爆起上，邊個都阻唔到，尤其今次好多熱門實力馬睇落係似是而非，一個唔小心隨時買錯，真真正正貼錢買難受！因此，抱住買得細、巴巴閉心態最好。

　　第二場四班1000米。「蜜圈」初出入位，正是田草直路賽，場佢放放差少少就到，但輸畀「點解」同「銳不可擋」，又唔係水皮。

　　呢匹馬上次走去谷中，事後睇，部署大膽，輸都冇法子。自此之後，隔一大輪再跑，之前係就係停過課，既然停得一時，如果唔係搞番掂，使鬼夾硬跑，不如再操多一陣，所以，今次阿成畀得隻馬跑，梗有把炮，何況，回到此程，機會提高。

　　第六場四班1600米。「天笑」1000米至1400米跑過晒，場場追人唔切，唔知係實力不如，定係路程傾向更長路程，不過咁，上次轉跑1400米，末段追趕力又真係比短途勁，亦有可能因為咁，阿Paul索性安排隻馬再加程，可能多跑二百米有幫助，可以多時間追人。

　　十二門徒變招有計

　　第九場三班馬1400米。「十二門徒」前仗贏得「創基寶」，姿態鬼咁易，冇理由上番三班冇晒，冇好賴，惟有話係轉到谷中有影響。

　　但今次方仔唔報1200米，特登將「十二門徒」轉到此程，點解會咁樣，只有佢自己至知，呢匹馬上季跑過一次此程，輸得幾遠，方仔唔會唔知呢個問題，佢都係要一試，梗有見地，一於信佢眼光，跟多場。(陳華棟 資深評馬人)