紅軍讓波係咁仙!

猪拉多纳

撞正剋星 SAS被廢武功

新正頭好多玄學家都會講吓馬年運程，科娜今年犯太歲，受多粒凶星影響，但我就唔係咁在意，反而身為利物浦粉絲，我就特別驚阿仙奴呢粒「剋星」。紅軍今晚喺主場迎戰兵工廠，無論喺兵源、對賽成績都不及對手，相信阿仙奴又會再一次剋死利物浦，雖然我係利迷都唔會盲撐，以菠菜角度都係揀阿仙奴讓球客勝最穩陣﹗

（now 621周六晚8時45分直播）
阿仙奴MK防線硬淨

目前利物浦陣中嘅5名傷兵全屬正選主力，佢哋缺陣肯定嚴重削弱競爭力，球會喺1月轉會窗又買唔到人，兵源調動捉襟見肘。當然，以現有陣容對住弱旅都仲夠砌，但一對住爭標勁旅如阿仙奴、車路士等，就立刻現形，阿仙奴雖然亦係傷兵滿營，但陣容深度點都唔會差得過紅軍，賽前領隊雲格更表示韋舒亞同阿迪達可以復出，連埋近態勇銳嘅阿歷士張伯倫、奧斯爾等，黃金中場重組成功，試問紅軍條老弱中場點頂先？

雖然話蘇亞雷斯同史杜列治呢對SAS組合喺前線好煞食，但阿仙奴後防都有梅迪薩卡同哥斯尼呢對「MK」組合足以鎮住SAS，首循環對紅軍就係靠佢兩個封死SAS，如今仗SAS又被廢武功，紅軍根本就冇勝算。
近12次交手僅1勝

兵源都係其次，正所謂世間萬物相生相剋，相信好多利迷見到唔同對手都會有唔同嘅心態，對死敵曼聯？唔驚。兩大豪門車路士同曼城？都唔係好驚。咁對住阿仙奴呢？答案係超驚﹗因為阿仙奴完全剋住咗紅軍，格食格呢家嘢真係唔到你唔信邪，兩軍近12次交手紅軍只係贏得1場咁大把，強如08至09球季嘅紅軍兩戰兵工廠都贏唔到，次循環嗰場經典嘅4比4大戰，「前槍手」艾沙維食出「大四喜」一幕相信大家都仲記得。

再講番近期對碰，今季英超首循環紅軍作客酋長球場，當時紅軍士氣正盛，SAS更係弗到漏，點知都要淨吞兩蛋，所以話利迷又點會唔驚阿仙奴先？撞正剋星，科娜決定喺感情之中作出理智選擇，捧受讓嘅阿仙奴。