車仔「讓主」啱「素」

猪拉多纳

喜鵲前線冇料到

英超爭標形勢愈嚟愈激烈！由「寸王」莫連奴帶領嘅車路士，上場聯賽作客以一招穩守突擊砌低億萬大軍曼城，成功打破「藍月亮」主場不敗金身，追到同曼城同分之外，相距榜首阿仙奴僅剩兩分之差。今晚車路士喺史丹福橋迎戰「喜鵲」紐卡素，相信狀態弗到漏嘅「藍戰士」能夠再下一城，心水推介1.64倍「讓主」！

車路士早前主場被韋斯咸死守失分，激到莫連奴鬧爆對手踢19世紀足球，轉頭「寸王」就作親身示範，證明死守嘅同時都能夠贏波！「藍戰士」周二作客曼城，採取穩守突擊戰術，雖然全場大部分時間被對手控制戰局，不過最終憑伊雲洛域一箭定江山以1:0贏波，成功打破曼城聯賽主場不敗身，更令「藍月亮」自10年11月以嚟首次聯賽主場冇波入，「寸王」條氣肯定順晒！
車仔聯賽主場不敗

再睇埋車仔主場表現極之標青，今季12場聯賽都冇輸過，取得10勝2和佳績。而且佢哋近6次「讓球主客和」讓1球盤口，其中有4場贏波贏盤，加上今晚擁有主場之利，小妹覺得「藍戰士」要讓波都根本冇難度，相信佢哋可以輕鬆擊敗紐卡素。
紐卡素盧克迪莊幫唔到手

另邊廂，紐卡素中場猛將卡比耶離隊，前線核心雷米又要坐波監，情況令人擔憂。唯一好消息係借到德甲慕遜加柏射手盧克迪莊，可惜呢名荷蘭國腳狀態曳到爆，今季喺德甲13次後備落場都冇波入，而且仲要畀時間佢融入球隊同適應英超踢法添，今場未必幫到手。更何況「喜鵲」上輪喺東北打吡戰主場淨吞新特蘭3蛋，士氣大受打擊，今晚到訪史丹福橋恐怕凶多吉少。