皇馬襲黃潛小勝格

猪拉多纳

皇家馬德里周中喺西班牙盃4強首回合，憑比比、迪馬利亞同謝斯洛迪古斯嘅入波，贈送同市宿敵馬德里體育會3蛋，躋身決賽高唱入雲，球員士氣更達致巔峰，今晚重返西甲迎戰維拉利爾，大有機會藉地利擸足3分，但礙於「士哥拿」C朗停賽缺陣，對攻擊力造成一定影響，張峰今場推介3.85倍「讓球和」，博皇馬小勝而回。

（now632台周日凌晨3:00直播）
維拉利爾專剋馬德里球隊

皇馬喺上輪聯賽作客畢爾包，球星C朗做咗紅牌阿姑，最終打少個慘被逼和痛失兩分，幸好巴塞隆拿喺主場輸波跌晒3分，呢對西甲宿敵現時同得54分，以3分差距落後畀榜首馬體會。今戰「銀河艦隊」有C朗上訴失敗開始執行3場停賽令，但有加里夫巴利重披戰袍，又有腳風頗順嘅謝斯洛迪古斯同迪馬利亞從旁協助，其中「謝斯仔」連續3場有波入，搭埋狀態唔錯嘅賓施馬，火力仍然有一定保證。

至於維拉利爾今季人腳不俗，陣中杜斯山度士、卡尼同佩比均屬好波之人，配合衝刺力強嘅烏捷，前線實力不容小覷，今季聯賽主場分別令兩支馬德里市爭標分子失分，更盡顯面對勁旅都冇有怕嘅本色，今晚對住如狼似虎嘅皇馬絕對有力一戰，相信輸波都只會1球上落。