港人肯做冇嘢唔掂！

猪拉多纳

Peter今個新春要為三色台做評述賀歲盃，所以有機會親身再踩大球場草地，感覺真係好好。自從93年大球場重建後，依家草地情況絕對係最密最綠最理想，講波時望住個球場，草地靚到好似地氈咁樣，直頭用嚟瞓覺都得啊，唔使再用爛場招呼外隊，總算一雪前恥。

大球場由大爛場變番做綠草如茵嘅靚場，再次證明一件事，香港人若果要搞好一樣嘢，冇話冇辦法，最緊要話事人係夠吉士，唔好因為驚畀人投訴、質疑同唾罵，最後就決定少做少錯。依家香港好多怨氣，令到好多話事人變得愈來愈保守，吓吓都行安全棋，咁樣只會乜都做唔到。
大球場翻修咪再拖

大球場去年夏天成為國際笑話，其實有好多個原因，包括打欖球踩到草皮爛晒，同埋突然爆水管，加上短短幾日內接連應付多場賽事，咁多樣嘢一次過同時出現，先搞到變「薯仔田」。長遠嚟睇，大球場去水道要翻修，寧願休戰十個月，都唔好再呃自己，一拖再拖，唔會解決到問題。

既然都要搞草皮，Peter認為最好翻新埋記者室，貴賓室同更衣室，幫大球場全面大執，令香港擁有個東亞區最佳嘅球場。
金句：大球場的怒與樂