富咸角球煞食撼紅魔做大騷

猪拉多纳

曼聯同富咸今晚喺奧脫福正面交鋒，紅魔計牌面、人腳同往績都秤贏富咸幾條街，不過呢隊衰波近排踢成點大家唔係冇眼見，既然兩瓣「主勝」都冇乜肉食，倒不如向入球大埋手，剝定花生睇「富咸殺手」朗尼表演，同埋富咸嘅「食胡角球」攻勢好過，捧中位數係3.5球嘅2.15倍大。

（now621台周一凌晨0:00直播）

如果當聯賽盃4強次回合射輸12碼畀新特蘭係敗仗嘅話，曼聯近8場波足足輸咗6場，上場波仲衰到輸埋畀史篤城，證明由莫耶斯執教嘅紅魔冇嘢係冇可能，所以就算佢哋對上9次喺英超主場對富咸贏晒，亨格比利都唔信曼聯今場係啅硬。之不過咁，尹佩斯傷愈復出後兩仗都有波入，朗尼近6次鬥富咸更加有5球進帳，一個腳風順，一個專恰富咸，加埋新王牌桑馬達喺中場派牌，富咸確係幾難頂得住曼聯嘅來襲。
「富咸殺手」朗尼孭飛

富咸目前喺聯賽墊底，橫又死掂又死，今晚造訪霸氣不再嘅曼聯當然奢望以全取3分為目標，可以預期由倒戈主帥梅倫史甸領軍嘅佢哋唔慌踢得保守。呢支倫敦球隊喺轉會限期前掃入6位「救火英雄」，當中以身價達1,200萬鎊嘅美度古最有睇頭，呢位希臘射手過去兩季為奧林比亞高斯攻入37球，英超處子戰撞啱喺「夢劇場」上演，當然想趁機揚名立萬。況且另一生力軍賀治比亦係好波之人，對住有菲爾鍾斯因為腦震盪缺陣、莊尼伊雲斯傷小腿未必出得嘅曼聯防線，要入波唔係天方夜譚。
斬波專家李察臣復出

再講，富咸今季有7個入波嚟自角球，只僅次於「火力王」曼城，咁啱出名斬波靚嘅基蘭李察臣克服足踝傷患復出倒戈，有佢處理角球肯定令富咸入球威力大增。睇埋往績，雙方近6次交手有4次總入球係4球或以上，唔捧大捧咩呀？