拖肥硬淨唔驚熱刺

猪拉多纳

英超前列戰況激烈，頭3位嘅阿仙奴、曼城同車路士爭標形勢緊湊，4至6位嘅利物浦、愛華頓同熱刺就爭搶歐聯入場券，隊隊分數都咬得好緊！其中決心爭入前4嘅愛華頓，近排狀態大勇，今晚作客遇強愈弱嘅熱刺，心水推介「拖肥糖」受讓平半嘅下盤。
盧卡古養傷火力冇減弱

熱刺今季英超戰績只屬一般，鬥勁旅往往輸波而回，要靠喺弱旅身上攞分。再者佢哋近況認真麻麻，上月底主場被億萬大軍曼城怒炒5:1，跟住作客中游分子侯城亦都「擒虎」失敗，落後下幾經艱苦逼和對手1:1，今晚就算有主場之利，抖咗8個禮拜嘅安祖斯唐辛又復出，小妹都唔睇好佢哋有咩作為。

相反愛華頓今季淨係輸過3場波，成績拍得住榜首阿仙奴，係現時英超輸波最少隊伍。而「拖肥糖」喺呢幾場敗仗當中，有兩場分別作客不敵主場火力極強嘅利物浦同曼城，輸波情有可原。雖然射手盧卡古要養傷，但佢哋上場鬥維拉缺少咗「小魔獸」，最後都能夠以2:1反勝，證明火力並無減弱，加上最近8場波只輸過1場，班波硬淨到咁，今晚唔使驚被熱刺拮親。