西維爾巴塞一樣咁「大」鑊

猪拉多纳

守將跌Watt甩漏多

西甲今晚壓軸戰，由西維爾主場迎戰巴塞隆拿。西維爾近排狀態唔多掂，防線暴露唔少漏洞，面對巴塞極具侵略性嘅進攻，點會守得住呀？不過巴塞班守將亦唔好得去邊，上輪聯賽鬥華倫西亞更錯漏百出，輸波可謂咎由自取，既然兩軍都攻強於守，今場個1.45倍入球大咁好路，點都要跟一跟。

（now632台周一凌晨4:00直播）
馬斯真蘭奴 艾巴停賽

西維爾教頭艾美利一向都唔滿意後防嘅表現，上仗鬥馬拉加刻意排出5人防線，可惜都係冇乜改善，最終西維爾喺領先嘅優勢下，7分鐘內連失兩粒，連續兩場以2:3落敗。班守將雖然跌晒Watt，之不過西維爾嘅中前場球員都仲靠得住，卡路士巴卡同拿傑迪錫近期輪住入波，加埋經驗豐富嘅雷恩斯同好波之人加美路，鋒力相當靠得住，主場出戰，絕對有能力攻破巴塞大門。

巴塞上星期喺魯營倒灶不敵華倫，防線一定要負上最大責任，丹尼爾、碧基以至防守中場布斯基斯完全走晒樣，反而轉踢中堅嘅馬斯真蘭奴最靠得住，弊就弊在「馬斯佬」儲夠黃牌，今戰與左閘佐迪艾巴齊齊停賽，面對鋒力不俗嘅西維爾，實在難保清白身。

好在中前場尚算齊腳，美斯、恩尼斯達等猛將能夠落場搏殺，進攻始終有保證，既然兩邊都攻得唔守得，梗係捧大等睇入球騷啦！