車仔征西踩行油

猪拉多纳

強勢登榜首 夏薩特弗爆

車路士寸王莫連奴今季回歸英倫球壇謙虛得過火，坐到上榜首位置仍然話目標只為入前四奪歐聯席位，搵鬼信你咩！車仔喺莫帥悉心調教下霸氣漸露，今次快車期作客西布朗更可以超強後備力量作輪換，西布朗頂唔住呢架踩行油嘅戰車，熱捧客勝！

（now 621周三凌晨4時直播）

跟莫連奴搵食有個好處，就係焦點永遠都落喺佢身上，球員壓力細好多。佢真係好擅長幫球員減壓，之前咬住阿仙奴同曼城已經多番講過球隊只係處於重整期，未有爭霸之力，上輪殺上榜首後莫帥仍然話曼城先係爭標大熱，死口唔認班波可以奪冠，仲話季內唯一目標係打入前四。講真，班波有幾多料係人都睇到，難得莫帥仲假到爆咁成日扮謙，都幾搞鬼！

車路士前仗作客對住「喪攻王」曼城以快速反擊踢法打到對手落花流水，夏薩特玩謝曼城防線令人印象深刻，呢位比利時球星上場鬥紐卡素大爆發連中三元，今期英超最紅一定係佢，條友突破能力超勁又識分波，仲要弗到識入波，點頂啊！
西布朗態沉防線穿窿

車仔中堅泰利及箭頭費蘭度托利斯仲有傷，但大軍後備力量極強，中場又有拉美利斯同韋利安等跑得之人，快車期照樣可以緊迫踢法逼死對手！

西布朗改由梅爾帶隊後未有起色，上場對住護級大敵水晶宮又輸，雖然新箭頭比科馬有士哥，但後防問題實在令人擔心，大軍近三場喪失八粒，家陣跌到落尾三，情況都幾壞！西布朗今季主場曾經對住阿仙奴同利物浦等實力分子都唔使輸，但今次要同全面撻着狀態嘅車仔硬撼，恐怕都係無力搶分。