仙魔齊謝捱細界

猪拉多纳

教授變「暈格」 撞正「莫耶輸」

今個周中英超加開快車，最矚目梗係傳統大戰阿仙奴主場迎戰曼聯。兵工廠已經連續6場喺自己地頭保持清白之身，不過佢哋每逢踏入「黑色2月」，經常離奇跌Watt，上仗慘敗畀利物浦有辦你睇，為擺脫魔咒今仗會更加謹慎，搓住踢睇定先食，紅魔進攻戰術太過單調，獨沽一味斬高波畀人睇穿晒，隨時悶戰一場，轉玩入球細好過。

（now 621周四凌晨3時45分直播）
兵工廠主場興小勝

阿仙奴今季一改好大喜「攻」嘅風格，尤其主場出擊經常小勝算數，最重要係防守表現大有改善，之前6場喺自己地頭嘅正式比賽未失過波，不妨再睇遠少少，佢哋近11仗坐鎮酋長球場，只係失咗1粒咁大把。由於阿仙奴班中場個個都控球能力強，搞到對手好難搶到波，變相鞏固埋防線，特別喺領先之下最鍾意搓到完場，因此多仗主場造出小勝賽果。

不過，阿仙奴每逢去到2月，好似撞邪咁離奇跌Watt，舉幾個經典例子：08年作客伯明翰發生前鋒伊度亞度達施華斷腳事件，令佢哋士氣大跌接連失分，錯過奪標良機；11年作客紐卡素領先4球下竟被追和，之後英聯盃決賽又遇上伯明翰，中堅哥斯尼同門神施捷斯尼忽然發波瘟犯錯，搞到以1比2輸波失盃；加埋上年喺英足盃及歐聯遭布力般和拜仁淘汰，阿仙奴喺2月非常黑仔。
曼聯傳中踢法勁過時

況且阿仙奴前幾日作客1比5大敗畀利物浦，頭20分鐘已經輸緊4粒，搞到領隊雲格都輸到「暈」，賽後返倫敦時仆地，睇嚟佢哋今年2月一樣咁黑，吸收過咁慘痛嘅教訓，加上鐵血防中法米尼仍要停賽，「教授」會叫班手下先做好防守，唔會心急搶攻，睇準先作出致命一擊。至於曼聯主帥莫耶斯仍未搵到合適嘅戰術，經常變陣搞到球員不知所措，特別係佢勁鍾意上世紀七十年代嘅兩翼側擊斬高波踢法，上仗對富咸更造出81次傳中嘅紀錄，但桑馬達、朗尼、尹佩斯更擅於中路地面入滲，令紅魔嘅攻擊死晒火，搓住嚟踢嘅阿仙奴更易於防範，今仗唔慌多波入，細盤有買趁早。
領隊Chit Chat

雲格(阿仙奴):我認為上場大敗只係意外，我哋喺挫敗時會諗番班波本身有幾好，球隊一直好努力，我有信心今場會重返正軌。

莫耶斯(曼聯):我冇諗過今季會輸咁多場，班波場上已經用盡全力作戰，但往往未能取得成績，今季球隊一直都出現呢個情況。