漢堡留力唔陪拜仁癲

猪拉多纳

距聯賽生死戰唔夠三日

德國盃半準決賽焦點當然係南北大戰，北部傳統勁旅漢堡主場迎戰南方霸主拜仁慕尼黑，不過今時唔同往日，漢堡正處於創會126年以來最大危機中，目前唯一目標係護級成功，根本唔得閒理德國盃，何況對手仲係當今最強嘅拜仁慕尼黑，就算搏都唔會有機會，今晚隨時收起主力Hea踢算數，讓球主客和拜仁讓兩球都唔算多，黑柴強捧2.15倍讓球客勝。

（無綫翡翠台周四凌晨3時30分直播）

漢堡近期愈踢愈曳，德甲6連敗已經破咗創會以來最長紀錄，目前聯賽排名跌到尾二，嚟緊周六聯賽作客對榜尾嘅布倫瑞克，絕對係關鍵生死戰，對布倫瑞克場波距離今仗唔夠三日，黑柴相信漢堡會放棄今仗，事實上今場南北大戰嘅賽前記者會已令德國傳媒嘩然，原因係漢堡教練雲馬維克喺記者會上只發表不尋常嘅簡短聲明：「我哋目前嘅情況，對一支歷史悠久嘅球會嚟講係恥辱，但我向大家保證，漢堡會為德甲席位戰鬥到底！」呢個簡短聲明根本冇提及今晚對拜仁場波，雲帥發表聲明後更拒絕回答記者提問，立即離場。
拜仁上季炒過9比2

拜仁情況同漢堡當然一天一地，佢哋聯賽遙遙領先，不斷刷新紀錄，如今喺德甲根本冇晒對手，自然有餘力染指盃仔。睇埋賽程，雖然下周中有歐聯作客阿仙奴嘅大戰，但嚟緊周末德甲只係主場對弱旅弗賴堡，教練哥迪奧拿大可先搏埋今場，喺周末至畀主力球員休息。

基於漢堡係傳統勁旅，拜仁對佢哋向來都唔會輕敵同留手，近三次碰頭都取得大勝，上季聯賽更炒過漢堡9比2，今仗雖有國王列貝利因傷缺陣，但後備兵源實在太勁，面對無心戀戰嘅漢堡注定係大炒格。