肥賓盃賽拿手打羅打鼓

猪拉多纳

意大利盃4強次回合，拿玻里返主場再撼羅馬，拿玻里首回合僅輸2比3，有兩粒作客入球在手，收復失地晉級機會仍然樂觀，必定搏命力爭決賽席位。唔好忘記拿玻里教練「肥賓」賓尼迪斯係「盃賽專家」，相信佢有計率領球隊克服劣勢。羅馬剛經過打吡戰惡鬥，未必回得切氣，受讓平半都冇着數，力捧拿玻里上盤。

（now 633及660周四凌晨3時45分直播）

以近況來講，羅馬確係好啲，但拿玻里亦唔失禮，首回合落後兩球之下，曾經一度扳平，上仗聯賽力挫AC米蘭，整體表現出色，射手希古恩梅開二度，狀態有明顯改善。拿玻里聯賽分數落後太多，今季目標係取得下屆歐聯入場券，以及爭吓歐霸同意盃。呢方面開正賓尼迪斯嗰瓣，佢帶過華倫西亞、利物浦、國際米蘭及車路士贏過盃賽冠軍，當中教國米同車仔半季貨仔，都有盃落袋，不得不佩服佢嘅盃賽運，因此，有信心賓帥今次可以帶領拿玻里過關。
羅馬踢完打吡未回氣

羅馬近期經歷連番惡鬥，包括兩戰祖雲達斯，上仗首都打吡對拉素，佔盡上風都只係互交白卷，難免有啲洩氣，亦消耗大量體力。羅馬人腳唔算充裕，正選陣容亦甚少輪換，匆匆再戰強敵恐怕吃不消，抵擋唔住拿玻里猛攻。