蒙通聯細守死勝利

猪拉多纳

周六另一場亞冠盃外圍賽第三圈賽事，澳洲代表墨爾本勝利改喺吉朗加甸尼亞公園球場鬥泰國球隊蒙通聯，主隊為增勝算使橫手，令客軍北韓球員李光川冇得入境，仲散播蒙軍主帥史葛曲巴離隊謠言。蒙通聯一肚火，定必打死唔出堅守城池，今場博細盤！

（now 671周六下午4時45分直播）
北韓腳被拒入境一肚火

為爭亞冠盃分組賽席位，墨爾本勝利去得好盡，先出招令蒙通聯北韓大將李光川不獲發簽證，削弱對手實力，班波得番前卡迪夫城中鋒保夫萊特同泰國神鋒鄧達，要撕破對手防線唔容易。澳洲傳媒賽前仲瘋傳蒙通聯教頭史葛曲巴突然離隊，佢馬上拍片闢謠，仲話墨爾本勝利怕咗佢哋，所以散播謠言擾亂軍心，呢次作客處下風，佢實落柯打叫班兵死守到底！

墨爾本勝利主場AAMI公園球場合約訂明唔包亞冠盃，今次外圍賽改用吉朗加甸尼亞公園球場，個場同處維多利亞州，據悉波飛銷情麻麻，幾日前只賣出5,000張門票，勝利始終唔係踢開呢個場，發揮點都要打折扣，佢哋早前連輸兩場0比5，信心麻麻，老將艾奇湯臣已跌Watt，得個杜羅奧斯難破密集，呢場要細盤！