修咸頓翻「新」博「讓和」

猪拉多纳

足總盃16強早場激戰

足總盃第5圈（16強）揭開戰幔，今晚除咗有曼城硬撼車路士呢場大戰，早場仲有新特蘭迎戰修咸頓！「聖人」自從元旦日輸咗鑊勁嘅畀車路士之後，打落8場波都未輸過，整體戰鬥力更加喺新特蘭之上，考慮到「黑貓」自從由普耶領軍之後明顯有起色，今鋪主場出擊就算輸都唔會輸得太肉酸，Yennie睇好修咸頓小勝晉級，一於捧分頭十足嘅3.75倍「讓球和」。
土炮三叉戟有料到

修咸頓自從元旦日喺聯賽狂吞車路士3蛋後，到依家為止喺各項賽事包括聯賽同足總盃在內，一場都未輸過，簡直就係氣勢如虹！查實「聖人」成績咁好，除咗話領隊普捷天奴有料，「三獅三叉戟」交足貨亦係主因。3位英格蘭國腳列基林拔、拉爾拉拿同埋積洛迪古斯勁有火花，踏入2014年已經合力炮製咗10個「士哥」，就算今鋪去到光明球場都有能力反客為主，撕破新特蘭防線。

主場嘅新特蘭對上兩輪足總盃受到嘅考驗唔大，分別只係淘汰卡素爾同京達米士特兩支低組別球隊，呢勻遇上同級嘅修咸頓肯定惡踢。況且「黑貓」上場聯賽輸畀侯城0:2場波，晨早就有中堅布朗領紅被逐，以寡敵眾咗成場波，班球員唔攰就有鬼啦！
新特蘭換帥後有起色

之不過咁，自從普耶掌舵之後，「黑貓」表現明顯有好轉，當中更加打起咗26歲翼鋒阿當莊臣。呢位1月份英超最佳球員，單計2014年已經有7球進帳，今仗喺自己地頭出擊當然想繼續數胡啦，照計就算輸都應該只會僅敗，敲修咸頓煲魚生粥啱數。