「先客後主」嗰隊着數晒

猪拉多纳

今屆嘅歐聯淘汰賽，由於8場16強首回合分開兩周進行，一晚只得兩場波，粉絲們喺電視機前唔使拎住個遙控左右之外，亦有利各隊主帥嘅部署。由於分組賽首名出線球隊均「先客後主」，只要首回合唔輸多過1粒，或者即使落敗但卻爭取到作客入球的話，等到次回合返主場，有料嘅教頭便可睇定形勢，作出針對性部署，所以「先客後主」其實相當着數，呢個亦係歐聯賽制引人入勝之處。

睇番呢兩晚嘅作客球隊，無論係聖日耳門、拜仁定係馬體會均技高一籌，就算作客都坐和望贏，惟獨曼城主場火併巴塞之役最勢均力敵。巴塞近8屆3度登上歐洲之巔，實力毋庸置疑，主帥馬天奴希望眾將享受足球。Peter做過教練，明白只要讓球員踢得開心，自然會踢高一皮波。
大賽經驗最緊要

作為歐聯16強初哥，曼城領隊比歷連尼、隊長高柏尼及核心耶耶托尼亦唔敢認叻，認為「藍月亮」大賽經驗唔夠，但會盡力創造奇迹，的確喺呢項高水平賽事，經驗係非常重要，Peter認為曼城若喺歐聯有乜差池，隨時影響佢哋於其餘3項錦標嘅爭逐機會，因此「曼巴」之戰係2月必睇重頭戲。
金句：作客大過天