馬體會剷平聖西路

猪拉多纳

AC天殘地缺插翼難飛

今晚另一場歐聯16強首回合，AC米蘭在聖西路主場鬥馬德里體育會；昔日歐洲王者AC同意甲水準一樣，都係每況愈下，以佢哋今季差勁表現，可以進身淘汰賽簡直係奇迹。AC實力不如對手之餘，仲要飽受傷停問題打擊，殘陣出擊更加唔夠踢。馬體會喺西甲能夠同巴塞及皇馬鼎足而立，盡顯級數，就算話有力問鼎歐聯亦唔過分，今仗馬體會只係小讓平半，上盤抵玩。

（有線62及202台周四凌晨3時45分直播）
巴洛迪利孤軍作戰

AC今季無論聯賽或歐聯，表現都乏善可陳，即使換帥後亦唔見有明顯起色，更何況少帥施多夫教波經驗淺，來到歐聯呢類大賽更加輸蝕。AC今仗最大危機肯定係傷停問題，兩位中場主將蒙杜利禾、蒙達利停賽，後衞沙柏達華倫西亞、前鋒羅賓奴因傷倦勤。卡卡上仗聯賽傷出，雖然今仗仍可披甲，但未必恢復十足水準。季中來投、一度被視為救星嘅本田圭佑，由於曾為莫斯科中央陸軍喺今屆歐聯上陣，亦唔符合上陣資格。

數下數下，施多夫手上可用人腳好有限，惟有寄望巴洛迪利有神來之筆。問題係AC殘陣之下，恐怕連組織攻勢都有難度，巴神孤軍作戰，插翼難飛。加上防線脆弱，好大機會未入波已先失守。
迪亞高哥斯達弗到漏

馬體會今屆歐聯分組賽六戰五勝一和，戰績仲好過拜仁同巴塞。雖然馬體會近期一度三連敗，但當中兩場係西班牙盃對皇馬，輸波情有可原，上仗佢哋即大炒華拉度列，重振聲威。球隊依家開始心雄，要爭番個歐聯獎盃，真正做到同皇馬巴塞睇齊。射手迪亞高哥斯達今季西甲入波數字僅少過C朗一球，有幾犀利可想而知，以AC條豆腐防線，又點招架得住馬體會來襲呢？
泰拉拔盤扭皆掂有料到

泰拉拔由幫富咸打護級戰，突然登入豪門參加歐聯，堪稱球迷奇遇記。呢位摩洛哥翼鋒速度與腳法兼備，早前首次為AC上陣，即表演「美斯式盤球」，由半場一直扭到禁區外，射破拿玻里大門，奠定正選位置。AC人丁單薄，更加需要靠球員個人能力搵食，喺歐聯改着27號球衣嘅泰拉拔隨時成為一位奇兵。
迪亞高回巢校炮最耍家

馬體會除咗射手迪亞高哥斯達，仲有上月回巢嘅中場迪亞高，呢位前巴西國腳擅長校炮，為隊友創造入波機會。佢加盟後，進一步提升馬體會進攻板斧。迪亞高同對手卡卡曾經係享譽一時嘅森巴中場指揮官，今場再遇可謂感慨良多。
歐聯密碼

1:今場為AC教練施多夫執教生涯第1場歐聯比賽。

3:馬體會6場分組賽只失3球，同曼聯、車路士一樣係分組賽失球最少球隊，4:而且亦是分組賽3支不敗之師其中之一。

8:AC最近4次於歐聯兩回合淘汰賽遇上西甲球隊均被淘汰。

AC對上8次於主場面對西甲球隊只得1勝，為上屆16強首回合勝巴塞隆拿2比0。

49:馬體會前鋒迪亞高哥斯達今屆上陣196分鐘取得4個入球，平均每49分鐘入1球，射手榜首位C朗平均每50分鐘才入1球。