馬體會鋒銳攞「A」

猪拉多纳

「三個迪亞高」玩轉聖西路

「三個迪亞高」進襲聖西路！馬德里體育會近季喺施蒙尼（Diego Simeone）掌舵下「升晒呢」，今季靠迪亞高哥斯達（Diego Costa）起勢咁「士哥」，加埋最近回巢嘅迪亞高（Diego Ribas）重生，「床單兵團」有「三個迪亞高」助陣，點秤都高過中場穿晒窿嘅AC米蘭，今晚歐聯16強首回合去到聖西路讓平半，照撐馬體會1.83倍上盤。

（有線62及202周四凌晨3:45直播）

馬體會家陣喺西甲同巴、皇同得60分，只係因得失球差屈居第3，即係話「床單兵團」嘅卡士可以同上述兩大班霸睇齊，絕對唔嘢小。好多人都擔心馬體會踏入下半季就會跌Watt，皆因佢哋板櫈深度確係不足，但施蒙尼都醒水，上場聯賽大炒華拉度列3:0場波，就將迪亞高、韋拿同祖奧米蘭達等主將擺喺後備，明顯留力。
AC中前場甩皮甩骨

焦點人物迪亞高哥斯達今季喺所有賽事合共轟入26球，上場鬥華拉度列亦打破連續3場食白果嘅入球荒，加埋迪亞高自1月底回巢之後，明顯加強咗中場創造能力，大大減少「野獸」墮後搵波做策劃嘅次數，配合埋阿達杜倫同佐治高基等中前場猛將，「床單兵團」夠晒火力撕破AC米蘭條豆腐防線。

雖然話AC米蘭係歐聯7屆盟主，少帥施多夫更加係球壇唯一以球員身份代表過3隊波捧走歐聯嘅球員（阿積士1次、皇馬1次、AC米蘭2次），佢賽前話自己具備歐聯DNA添，弊在落場踢嘅唔係佢，而係回晒塘嘅「紅黑兵團」。

AC目前喺意甲排第9，足足落後榜首嘅祖雲達斯31分，戰鬥力明顯同意甲一線分子有距離，最大劑係攻擊靈魂本田圭佑唔合乎上陣資格，兩大中場蒙杜利禾同蒙達利更加要停賽，中前場甩皮甩骨，今鋪要靠連昆士柏流浪都唔用嘅泰拉拔衝鋒陷陣，唔多夠班喎！就算卡卡踢到曉飛都冇用啦！賽前卡卡話，AC上場贏完博洛尼亞之後有番信心，絕對有力同馬體會鍊過，但對住博洛呢啲護級分子，AC都只係贏1:0，狀態去到邊大家心中有數。況且馬體會「門神」泰拔高圖爾斯賽前講明做足功課研究巴洛迪利，馬體會有備而來，應該可以先拔頭籌啦！