巴塞訪凶地啃唔落皇蘇

猪拉多纳

西甲巴塞隆拿作客皇家蘇斯達，皇蘇唔單止喺主場出擊特別sharp醒，佢哋嘅安奴達球場猶如巴塞「凶地」，「地上最強」多番造訪都損手爛腳，加上啱啱喺歐聯激戰一場，以逸待勞嘅皇蘇相當着數，讓球主勝有分頭非常抵玩。
作客安奴達球場吃盡苦頭

踢波嘅嘢有時唔到你唔信邪，雖然巴塞實力贏皇蘇幾條街，但佢哋近年造訪安奴達球場真係膽戰心驚，近4次錄得2和2負嘅劣績，仲要係每次巴塞都先開紀錄，以為輕輕鬆鬆等收工，但鑊鑊都狼狽到暈，若果話早前西盃4強巴塞兩回合lead住3粒下完場前放水，上季次循環交手值得參照，當時巴塞開波冇耐就領先兩球，點知畀人追番粒陣腳大亂，先有中堅碧基領紅被逐，再有門神域陀華迪斯發波瘟，人衰行路打倒褪，最終皇蘇一鼓作氣贏3比2，並打破對方不敗之身。

其實皇蘇一向靠主場搵食，今季聯賽只係輸過畀馬體會，非常sharp醒，由於佢哋喺歐聯及西盃出局，可疊埋心水衝擊下屆歐聯入場券，依家只差第4位嘅死敵畢爾包4分，為「錢」途一定搏甩髀。相反巴塞啱啱喺歐聯16強同曼城鬥得激烈，未有咁快回到氣，作客「凶地」硬撼養精蓄銳嘅皇蘇，隨時陰溝裏翻船，讓球主勝有3.25倍筍到爆，不容錯過。
now 632周日凌晨3時直播